只不過係去咗一日快閃台灣，今日D人咁奇怪嘅⋯⋯
1. 隻手俾蚊咬問醫生要唔要洗傷口⋯⋯
2. 喉嚨痛問少男之前有冇自己食定西藥，佢話食咗冰糖燕窩⋯⋯
3. 病人去專科醫生度睇完，隔幾日返嚟我哋診所。佢問專科有冇寫Reply Letter俾我地。我哋話冇收到信或者Fax 。佢好嬲問點解佢冇寫？大佬，我點知點解佢唔寫，你唔問佢但係喺度問返我嘅？
4. 同個30歲女病人聽肺，循例要佢深呼吸。佢認真地每一啖都係用盡喝奶的力量去深呼吸。因為每一次吸完佢係會成個人震晒咁hold住啖氣。我唔好意思叫佢唔使咁用力，所以我聽足四次都冇更正佢。幾驚最後佢吸到暈低。
Bonus 1:
呢個聽返黎嘅：有個人十萬火急沖上嚟診所，手抱住一隻受咗傷嘅雀仔，問可唔可以快D睇隻雀仔。姑娘話呢度唔係獸醫。佢好嬲咁話個姑娘見死不救⋯⋯
Bonus 2:
網購送貨，15分鐘前打電話嚟話Lunch會到。我哋Lunch會熄燈鎖門但係自己匿埋係入面食飯。我仲叫佢去到門口再打電話等我開門俾佢。好啦，之後佢打俾我，我就出去門口接佢。佢好惡問點解我哋呢度冇門鐘。佢留咗個電話係車，上到黎先知鎖左門。佢喺出面狂拍門我哋聽唔到，搞到要攞返去架車度攞。
診所冇門鐘好出奇咩？我咪提咗你叫你打俾我囉。唔係提你做咩啫。
#醫生脾氣臭唔好鬧我
～～
星期一早機去，晚機返，酒店都慳返 🤣🤣🤣
臨走嗰陣開始feel到颱風嘅威力，好彩返到黎～
Search